ಆವ ಕರ್ಮವೋ ಇದು ಆವ ಧರ್ಮವೋ ( ರಾಗ - ಪಂತುರಾವಳಿ, ತಾಳ - ರೂಪಕ )

ಆವ ಕರ್ಮವೋ ಇದು ಆವ ಧರ್ಮವೋ

ಆವ ಕರ್ಮವೆಂದರಿಯೆ, ಹಾರುವರಿವರು ಬಲ್ಲರೆ || ಪ ||

ಸತ್ತವನು ಎತ್ತ ಪೋದ

ಸತ್ತು ತನ್ನ ಜನ್ಮಕೆ ಪೋದ

ಸತ್ತವನು ಉಣ್ಣುವನೆಂದು

ನಿತ್ಯ ಪಿಂಡವಿಕ್ಕುತೀರಿ || ೧ ||

ಎಳ್ಳು ದರ್ಭೆ ಕೈಲಿ ಪಿಡಿದು

ಪಿತರ ತೃಪ್ತಿ ಪಡಿಸುತೀರಿ

ಎಳ್ಳು ಮೀನು ನುಂಗಿ ಹೋಯಿತು

ದರ್ಭೆ ನೀರೊಳು ಹರಿದು ಹೋಯಿತು || ೨ ||

ಎಡಕೆ ಒಂದು ಬಲಕೆ ಒಂದು

ಎಡಕೆ ತೋರಿಸಿ ಬಲಕೆ ತೋರಿಸಿ

ಕಡು ಧಾವಂತಪಡಿಸಿ

ಕಟಿಯ ಹಸ್ತದೊಳಗೆ ಪಿಡಿಸುತೀರಿ || ೩ || 

ಮಂತ್ರಾಕ್ಷತೆಯ ಕೈಗೆ ಕೊಟ್ಟು

ಮೋಕ್ಷವನ್ನು ಹಾರೈಸುವಿರಿ

ಮಂತ್ರವೆಲ್ಲೋ ಅಕ್ಷತೆಯೆಲ್ಲೊ

ಮೋಕ್ಷವೆಲ್ಲೋ ಮರ್ತ್ಯವೆಲ್ಲೊ || ೪ ||

ಹೇಳುವವನು ಅವಿವೇಕಿ

ಕೇಳುವವನು ಅಜ್ಞಾನಿ

ಹೇಳುವ ಕೇಳುವ ಇಬ್ಬರ ಸೊಲ್ಲ

ಆದಿಕೇಶವಮೂರ್ತಿ ಬಲ್ಲ || ೫ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು