ಆನೆಯ ನೋಡಿರಯ್ಯ (ರಾಗ - ಕಲ್ಯಾಣಿ, ತಾಳ - ಅಟ)

ಆನೆಯ ನೋಡಿರಯ್ಯ ನೀವೆಲ್ಲರು

ಆನಂದ ಪಡೆಯಿರಯ್ಯ

ತಾನು ತನ್ನವರೆಂಬ ಮಾನವರ ಸಲಹಿದ

ಪಾಂಡು ಚಕ್ರೇಶನ ಸುತಗೆ ಒಲಿದಾನೆ

ಗಂಡುಗಲಿ ಮಾಗಧನ ಒರಸಿದಾನೆ

ಹಿಂಡು ಗೋವಳರೊಳು ಹಿರಿಯನ ಕಳೆಯದಾನೆ

ಲಂಡರಿಗೆ ಎದೆಗೊಡುವ ಪುಂಡ ಆನೆ || 1 ||

ಬಾಲಕನ ನುಡಿ ಕೇಳಿ ಖಳನ ಸೀಳಿದಾನೆ

ಪಾಲುಂಡು ವಿದುರನ ಸಲಹಿದಾನೆ

ಲೋಲಾಕ್ಷಿಯ ಮಾನಭಂಗಕ್ಕೊದಗಿದಾನೆ

ಖೂಳ ಶಿಶುಪಾಲನ ಸೀಳಿದಾನೆ || 2 ||

ಅಜಮಿಳಗೆ ನಿಜಪದವಿಯ ಕೊಟ್ಟಾನೆ

ಕುಜನರೆಲ್ಲರನು ವರ್ಜಿಸಿದಾನೆ

ಅಜಪಿತ ಕಾಗಿನೆಲೆಯಾದಿಕೇಶವನೆ

ತ್ರಿಜಗವಲ್ಲಭ ತಾನು ಭಜಕರ ವಶದಾನೆ || 3 ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು