ಅಂಧಂತಮಸು ಇನ್ನಾರಿಗೆ (ರಾಗ - ಭೈರವಿ, ತಾಳ - ಅಟ)

ಅಂಧಂತಮಸು ಇನ್ನಾರಿಗೆ ಗೋವಿಂದನ

ನಿಂದಿಸುವರಿಗೆ

ಸಂದೇಹವಿಲ್ಲವು ಸಾರಿಸಾರಿಗೆ ವಾಯು-

ನಂದನನ ವಂದಿಸದವರಿಗೆ

ಮಾತುಮಾತಿಗೆ ಹರಿಯ ನಿಂದಿಸಿ-ಸ-

ರ್ವೋತ್ತಮ ಶಿವನೆಂದು ವಾದಿಸಿ

ಧಾತುಗ್ರಂಥಗಳೆಲ್ಲ ತೋರಿಸಿ -ವೇ-

ದಾಂತ ಪ್ರಮಾಣಗಳ ಹಾರಿಸಿ

ಸೋತು ಸಂಕಟ ಪಟ್ಟು ಘಾತಕ ಒಡಲೊಳಗಿಟ್ಟು

ನೀತಿ ಹೇಳುವ ಕೆಟ್ಟ ಜಾತಿಗಳಲ್ಲದೆ || 1 ||

ಮೂಲಕವತಾರಕ್ಕೆ ಭೇದವು-ಮುಖ್ಯ

ಶೀಲಪಂಡಿತರೊಳಗೆ ಅತಿ ವಾದವು

ಲೀಲಾಸಾದೃಶ್ಯವ ತೋರುವ ಲಿಂಗ-

ಭಂಗವಿಲ್ಲದ ದೇಹ ಹಾರುತ

ಮೂಲಗುರುವು ಕುಂತೀಬಾಲನೆನ್ನದೆ ವೃಥಾ

ಶೀಲಗೆಟ್ಟಂಥ ಖಳರಿಗಲ್ಲದೆ ಮತ್ತೆ || 2 ||

ವ್ಯಾಸರ ಮಾತುಗಳಾಡುತ-ವಿ-

ಶ್ವಾಸಘಾತಕತನ ಮಾಡುತ

ದೋಷವೆಂದರೆ ನುಡಿ ಕೇಳದೆ-ಸಂ-

ತೋಷವೆಂದರೆ ನೋಡಿ ಬಾಳದೆ

ಶೇಷಶಯನ ಆದಿಕೇಶವರಾಯನ

ದಾಸರೊಡೆಯ ಮಧ್ವ ದ್ವೇಷಿಗಳಿಗಲ್ಲದೆ || 3 ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು