ಕೇಶವ ನಾಮ

ಈಶ ನಿನ್ನ ಚರಣ ಭಜನೆ ಆಶೆಯಿಂದ ಮಾಡುವೆನು

ದೋಷರಾಶಿ ನಾಶ ಮಾಡು ಶ್ರೀಶ ಕೇಶವ || ೧ ||

ಶರಣು ಹೊಕ್ಕೆನಯ್ಯ ಎನ್ನ ಮರಣ ಸಮಯದಲ್ಲಿ ನಿನ್ನ

ಚರಣ ಸ್ಮರಣೆ ಕರುಣಿಸಯ್ಯ ನಾರಾಯಣ || ೨ ||

ಶೋಧಿಸೆನ್ನ ಭವದ ಕಲುಶ ಬೋಧಿಸಯ್ಯ ಜ್ಞಾನವೆನಗೆ

ಬಾಧಿಸುವ ಯಮನ ಬಾಧೆ ಬಿಡಿಸು ಮಾಧವ || ೩ ||

ಹಿಂದನೇಕ ಯೋನಿಗಳಲಿ ಬಂದು ಬಂದು ನೊಂದೆನಯ್ಯ

ಇಂದು ಭವದ ಬಂಧ ಬಿಡಿಸು ತಂದೆ ಗೋವಿಂದಾ || ೪ ||

ಭ್ರಷ್ಟವೆನಿಸಬೇಡ ಕೃಷ್ಣ ಇಷ್ಟು ಮಾತ್ರ ಬೇಡಿಕೊಂಬೆ

ಶಿಷ್ಟರೊಡನೆ ಇಟ್ಟು ಕಷ್ಟ ಬಿಡಿಸು ವಿಷ್ಣುವೇ || ೫ ||

ಮದನನಯ್ಯ ನಿನ್ನ ಮಹಿಮೆ ವದನದಲ್ಲಿ ನುಡುಯುವಂತೆ

ಹೃದಯದೊಳಗೆ ಹುದುಗಿಸಯ್ಯ ಮಧುಸೂದನಾ || ೬ ||

ಕವಿದುಕೊಂಡು ಇರುವ ಪಾಪ ಸವೆದುಪೋಗುವಂತೆ ಮಾಡೊ

ಜವನ ಬಾಧೆಯನ್ನ ಬಿಡಿಸು ಶ್ರೀ ತ್ರಿವಿಕ್ರಮಾ || ೭ ||

ಕಾಮಜನಕ ನಿನ್ನ ನಾಮ ಪ್ರೇಮದಿಂದ ಪಾಡುವಂತೆ

ನೇಮವೆನಗೆ ಪಾಲಿಸಯ್ಯ ಸ್ವಾಮಿ ವಾಮನಾ || ೮ ||

ಮೊದಲು ನಿನ್ನ ಪಾದಪೂಜೆ ಒದಗುವಂತೆ ಮಾಡೊ ಎನ್ನ

ಹೃದಯದಲ್ಲಿ ಸದನ ಮಾಡೊ ಮುದದಿ ಶ್ರೀಧರ || ೯ ||

ಹುಸಿಯನಾಡಿ ಹೊಟ್ಟೆ ಹೊರೆವ ವಿಷಯದಲ್ಲಿ ರಸಿಕನೆಂದು

ಹುಸಿಗೆ ಹಾಕದೀರಯ್ಯಾ ಹೃಷೀಕೇಶನೇ || ೧೦ ||

ಬಿದ್ದು ಭವದನೇಕ ಜನುಮ ಬದ್ಧನಾಗಿ ಕಲುಶದಿಂದ

ಗೆದ್ದುಪೋಪ ಬುದ್ಧಿ ತೋರೊ ಪದ್ಮನಾಭನೇ || ೧೧ ||

ಕಾಮ ಕ್ರೋಧ ಬಿಡಿಸಿ ನಿನ್ನ ನಾಮ ಜಿಹ್ವೆಯೊಳಗೆ ನುಡಿಸೊ

ಶ್ರೀ ಮಹಾನುಭಾವನಾದ ದಾಮೋದರಾ || ೧೨ ||

ಪಂಕಜಾಕ್ಷ ನೀನು ಎನ್ನ ಮಂಕು ಬುದ್ಧಿಯನ್ನು ಬಿಡಿಸಿ

ಕಿಂಕರನ್ನ ಮಾಡಿಕೊಳ್ಳೊ ಸಂಕರುಷಣಾ || ೧೩ ||

ಏಸು ಜನುಮ ಬಂದರೇನು ದಾಸನಲ್ಲವೇನು ನಾನು

ಘಾಸಿ ಮಾಡದಿರು ಎನ್ನ ವಾಸುದೇವನೇ || ೧೪ ||

ಬುದ್ಧಿ ಶೂನ್ಯನಾಗಿ ಎನ್ನ ಬದ್ಧಕಾರ್ಯಕುಹಕ ಮನವ

ತಿದ್ದಿ ಹೃದಯ ಶುದ್ಧಿ ಮಾಡೊ ಪ್ರದ್ಯುಮ್ನನೇ || ೧೫ ||

ಜನನಿ ಜನಕ ನೀನೆ ಎಂದು ನೆನೆವೆನಯ್ಯ ದೀನಬಂಧು

ಎನಗೆ ಮುಕ್ತಿ ಪಾಲಿಸಯ್ಯ ಅನಿರುದ್ಧನೇ || ೧೬ ||

ಹರುಷದಿಂದ ನಿನ್ನ ನಾಮ ಸ್ಮರಿಸುವಂತೆ ಮಾಡು ನೇಮ

ವಿರಿಸು ಚರಣದಲ್ಲಿ ಪುರುಷೋತ್ತಮಾ || ೧೭ ||

ಸಾಧುಸಂಗ ಕೊಟ್ಟು ನಿನ್ನ ಪಾದಭಜನೆಯಿಟ್ಟು ಎನ್ನ

ಭೇದ ಮಾಡಿ ನೋಡದಿರೋ ಶ್ರೀ ಅಧೋಕ್ಷಜಾ || ೧೮ ||

ಚಾರು ಚರಣ ತೋರಿ ಎನಗೆ ಪಾರುಗಾಣಿಸಯ್ಯ ಕೊನೆಗೆ

ಭಾರ ಹಾಕುತಿರುವೆ ನಿನಗೆ ನಾರಸಿಂಹನೇ || ೧೯ ||

ಸಂಚಿತಾರ್ಥ ಪಾಪಗಳನು ಕಿಂಚಿತಾದ ಪೀಡೆಗಳನು

ಮುಂಚಿತವಾಗಿ ಕಳೆದು ಪೊರೆಯೊ ಸ್ವಾಮಿ ಅಚ್ಯುತಾ || ೨೦ ||

ಜ್ಞಾನ ಭಕ್ತಿ ಕೊಟ್ಟು ನಿನ್ನ ಧ್ಯಾನದಲ್ಲಿ ಇಟ್ಟು ಸದಾ

ಹೀನ ಬುದ್ಧಿ ಬಿಡಿಸು ಮುನ್ನ ಶ್ರೀ ಜನಾರ್ಧನಾ || ೨೧ ||

ಜಪತಪನುಷ್ಟಾನವಿಲ್ಲದೆ ಕುಪಥಗಾಮಿಯಾದ ಎನ್ನ

ಕೃಪೆಯಮಾಡಿ ಕ್ಷಮಿಸಬೇಕು ಹೇ ಉಪೇಂದ್ರನೇ || ೨೨ ||

ಮೊರೆಯ ಇಡುವೆನಯ್ಯ ನಿನಗೆ ಶರಧಿ ಶಯನ ಶುಭಮತಿಯ

ಇರಿಸು ಭಕ್ತನೆಂದು ಪರಮ ಪುರುಷ ಶ್ರೀ ಹರೀ || ೨೩ ||

ಪುಟ್ಟಿಸಲೇಬೇಡ ಇನ್ನು ಪುಟ್ಟಿಸಿದಕೆ ಪಾಲಿಸೆನ್ನ

ಇಷ್ಟು ಮಾತ್ರ ಬೇಡಿಕೊಂಬೆ ಶ್ರೀ ಕೃಷ್ಣನೇ || ೨೪ ||

ಸತ್ಯವಾದ ನಾಮಗಳನು ನಿತ್ಯದಲ್ಲಿ ಪಠಿಸುವವರ

ಅರ್ಥಿಯಿಂದ ಸಲಹುವನು ಕರ್ತೃ ಕೇಶವ || ೨೫ ||

ಮರೆಯದೆಲೆ ಹರಿಯ ನಾಮ ಬರೆದು ಓದಿ ಕೇಳಿದವಗೆ

ಕರೆದು ಮುಕ್ತಿ ಕೊಡುವ ನೆಲೆಯಾದಿಕೇಶವಾ || ೨೬ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಶ್ರೀ ಶ್ರೀಪಾದರಾಜ ಪಂಚರತ್ನ ಮಾಲಿಕಾ ಸ್ತೊತ್ರ

ವಂದೇ ಶ್ರೀಪಾದರಾಜಂ ರುಚಿತಮಹೃದಯಂ ಪೂಜಿತಶ್ರೀಸಹಾಯಂ

ನಿರ್ಧೂತಾಶೇಷಹೇಯಂ ನಿಭೃತಶುಭಚಯಂ ಭೂಮಿದೇವಾಭಿಗೇಯಮ್ ||

ವಿಪ್ರೇಭ್ಯೋದತ್ತದೇಯಂ ನಿಜಜನಸದಯಂ ಖಂಡಿತಾಶೇಷಮಾಯಂ

ನಿಷ್ಟ್ಯೂತಸ್ವಣ೯ಕಾಯಂ ಬಹುಗುಣನಿಲಯಂ ವಾದಿಸಂಘೈರಜೇಯಮ್ || ೧ ||

ಕ್ಷಭ್ಧಾದ್ವಾದಿಕರೀಂದ್ರ ವಾದಿಪಟಲೀಕುಂಭಚ್ಛಟಾ ಭೇದನ

ಪ್ರೌಢಪ್ರಾಭವತರ್ಕಸಂಘನಿಖರಶ್ರೇಣೀವಿಲಾಸೋಜ್ಜ್ವಲಃ ||

ಗೋಪೀನಾಥಮಹೇಂದ್ರಶೇಖರಲಸತ್ಪಾದಸ್ಥಲಾವಾಸಕೃತ್

ಪಾಯಾನ್ಮಾಂ ಭವಘೋರಕುಂಜರ ಭಯಾಚ್ಛ್ರೀಪಾದರಾಟ್ ಕೇಸರೀ || ೨ ||

ಬಿಭ್ರಾಣಂ ಕ್ಷೌಮವಾಸಃ ಕರಧೃತವಲಯಂ ಹಾರಕೇಯೂರಕಂಚೀ

ಗ್ರೈವೇಯಸ್ವಣ೯ಮಾಲಾ ಮಣಿಗಣಖಚಿತಾನೇಕ ಭೂಷಾಪ್ರಕರ್ಷಮ್ ||

ಭುಂಜಾನಂ ಷಷ್ಠಿಶಾಕಂ ಹಯಗಜಶಿಭಿಕಾನರ್ಘ್ಯ ಶಯ್ಯಾರಥಾಢ್ಯಂ

ವಂದೇ ಶ್ರೀಪಾದರಾಜಂ ತ್ರಿಭುವನವಿದಿತಂ ಘೋರವಾದಿಪ್ರಶಾಂತ್ಯೈ || ೩ ||

ಯದ್ಬೃಂದಾವನಸೇವಯಾ ಸುವಿಮಲಾಂ ವಿದ್ಯಾಂ ಪಶೂನ್ ಸಂತತಿಂ

ಧ್ಯಾನಂ ಜ್ಞಾನಮನಲ್ಪಕೀರ್ತಿನಿವಹಂ ಪ್ರಾಪ್ನೋತಿ ಸೌಖ್ಯಂ ಜನಃ ||

ತಂ ವಂದೇ ನರಸಿಂಹತೀರ್ಥ ನಿಲಯಂ ಶ್ರೀ ವ್ಯಾಸರಾಟ್ ಪೂಜಿತಂ

ಧ್ಯಾಯಂತಂ ಮನಸಾ ನೃಸಿಂಹಚರಣಂ ಶ್ರೀಪಾದರಾಜಂ ಗುರುಂ || ೪ ||

ಕಾಶೀ ಕೇದಾರ ಮಾಯಾಕರಿಗಿರಿ ಮಧುರಾ ದ್ವಾರಕ ವೇಂಕಟಾದ್ರಿ

ಶ್ರೀಮುಷ್ಣಕ್ಷೇತ್ರಪೂರ್ವ ತ್ರಿಭುವನವಿಲಸತ್ಪುಣ್ಯಭೂಮಿನಿವಾಸಃ ||

ಗುಲ್ಮಾದಿವ್ಯಾಧಿಹರ್ತಾ ಗುರುಗುಣನಿಲಯೋ ಭೂತಭೇತಾಲಭೇದೀ

ಭೂಯಾಚ್ಛ್ರೀಪಾದರಾಜೋ ನಿಖಿಲ ಶುಭತತಿ ಪ್ರಾಪ್ತಯೇ ಸಂತತಂ ನಃ || ೫ ||

ಶ್ರೀವ್ಯಾಸರಾಜವಿರಚಿತಂ ಪಂಚರತ್ನ ಮಾಲಿಕಾ

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಅನುಗಾಲವು ಚಿಂತೆ ಜೀವಕೆ ( ರಾಗ - ಕಾನಡ, ತಾಳ - ಅಟ್ಟ )

ಅನುಗಾಲವು ಚಿಂತೆ ಜೀವಕೆ ತನ್ನ

ಮನವು ಶ್ರೀರಂಗನೊಳ್ ಮೆಚ್ಚುವ ತನಕ || ಪ ||

ಸತಿಯು ಇದ್ದರು ಚಂತೆ ಸತಿಯು ಇಲ್ಲದ ಚಿಂತೆ

ಮತಿಹೀನ ಸತಿಯಾದರೂ ಚಿಂತೆಯು

ಪೃಥವಿಯೊಳಗೆ ಸತಿ ಅತಿ ಚೆಲ್ವೆಯಾದರೆ

ಮಿತಿ ಮೇರೆಯಿಲ್ಲದ ಮೋಹದ ಚಿಂತೆ || ೧ ||

ಪುತ್ರರಿದ್ದರು ಚಿಂತೆ ಪುತ್ರರಿಲ್ಲದ ಚಿಂತೆ 

ಅತ್ತು ಅನ್ನಕೆ ಕಾಡುವ ಚಿಂತೆಯು

ತುತ್ತಿನ ಆಸೆಗೆ ತುರುಗಳ ಕಾಯ್ದರು

ಸುತ್ತೇಳು ಕಡೆಯಿಲ್ಲದ ಚಿಂತೆಯು || ೨ ||

ಬಡವನಾದರು ಚಿಂತೆ ಬಲಿದನಾದರು ಚಿಂತೆ

ಹಿಡಿ ಹೊನ್ನು ಕೈಯೊಳಿದ್ದರು ಚಿಂತೆಯು

ಪೊಡವಿಯೊಳಗೆ ಸಿರಿಪುರಂದರವಿಠಲನ

ಬಿಡದೆ ಧ್ಯಾನಿಸಿದರೆ ಚಿಂತೆ ನಿಶ್ಚಿಂತೆ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಅಜ್ಞಾನಿಗಳ ಕೂಡೆ ಅಧಿಕ ಸ್ನೇಹಕ್ಕಿಂತ (ರಾಗ - ಮೋಹನ, ತಾಳ - ಝಂಪೆ )

ಅಜ್ಞಾನಿಗಳ ಕೂಡೆ ಅಧಿಕ ಸ್ನೇಹಕ್ಕಿಂತ

ಸುಜ್ಞಾನಿಗಳ ಕೂಡೆ ಜಗಳವೇ ಲೇಸು || ಪ ||

ಉಂಬುಡುವುದಕ್ಕಿರುವ ಅರಸನೋಲಗಕಿಂತ

ತುಂಬಿದೂರೊಳಗೆ ತಿರಿದುಂಬುವುದೆ ಲೇಸು

ಹಂಬಲಿಸಿ ಹಾಳು ಹರಟೆ ಹೊಡೆವುದಕಿಂತ

ನಂಬಿ ಹರಿದಾಸರೊಳು ಪೊಂದಿ ಹಾಡುವುದೆ ಲೇಸು || ೧ ||

ಒಡನೆ ಹಂಗಿಸುವವನ ಪಾಲೋಗರಕ್ಕಿಂತ

ಕುಡಿ ನೀರು ಕುಡಿದುಕೊಂಡಿಹುದೆ ಲೇಸು

ಬಿಡದೆ ಬಡಿದಾಡುವರ ನೆರೆಯಲ್ಲಿಹುದಕ್ಕಿಂತ

ಅಡವಿಯೊಳಗಜ್ಞಾತವಾಸವೇ ಲೇಸು || ೨ ||

ಮಸೆದು ಮತ್ಸರಿಪ ಸತಿಯೊಡನೆ ಸಂಸಾರಕ್ಕಿಂತ

ಹಸನಾದ ಹಾಳು ಗುಡಿಯೆ ಲೇಸು

ಬಿಸಜಾಕ್ಷ ಪುರಂದರವಿಟ್ಠಲನ ನೆನೆನೆನೆದು

ವಸುಧೆಯೊಳು ಚಿರಕಾಲವಿರುವುದೆ ಲೇಸು || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರೂ ಸಮಯಕ್ಕೊದಗಲಿಲ್ಲ ( ರಾಗ - ಮುಖಾರಿ, ತಾಳ - ಝಂಪೆ )

ಆರೂ ಸಮಯಕ್ಕೊದಗಲಿಲ್ಲ 

ಮೋರೆ ನೋಡುತ ಸುಮ್ಮನಿಹರೆಲ್ಲ || ಪ ||

ಮಗಳು ಮಹಲಕುಮಿ ಮೊಮ್ಮಗನು ಸರಸಿಜಭವನು

ಖಗರಾಜವಾಹನನು ತನ್ನಳಿಯನು

ಅಗಜನಂಬು ತನ್ನೊಡಲೊಳಿಂಬಿಟ್ಟು ಮೂ

ರ್ಬೊಗಸೆ ಮಾಡಿದ ಮುನಿಯ ಬಿಡಿಸಲಿಲ್ಲ || ೧ ||

ಶ್ರೀದೇವಿ ಭೂದೇವಿ ಮಾತೆಯರು ತಾವಿರಲು

ಯಾದವರಾಯ ಮೋಹದ ತಂದೆಯು

ವೇದಮುಖದಣ್ಣನಿರೆ ಉರಿನಯನದಿಂದ ಸ್ಮರ

ಬೂದಿಯಾಗುವಾಗ ಬಿಡಿಸಲಿಲ್ಲವೇಕೆ ? || ೨ ||

ಪಿತನು ಸಾಗರನು ಹಿತದಕ್ಕೆ ಶ್ರೀದೇವಿ

ಅತಿ ಬೀಗನಾದವ ನಾರಾಯಣ

ಜತೆ ಅಳಿಯರು ಬೊಮ್ಮ ಮನ್ಮಥರಿರಲಾಗಿ

ಕ್ಷತಿಯೊಳಗೆ ಶಶಿ ಕ್ಷೀಣವಾಗುವ ಸಮಯದಿ || ೩ ||

ತೆತ್ತೀಸಕೋಟಿ ದೇವರ್ಕಳು ತಾವಿರಲು

ಒತ್ತಿನಲಿ ಇಂದ್ರ ಉಪೇಂದ್ರರಿರಲು

ಮತ್ತೆ ಪಾರ್ವತಿ ಪುತ್ರ ವೀರೆಶ ದಕ್ಷನ

ನೆತ್ತಿ ಹರಿಗಡಿವಾಗ ನೋಡುತಿಹರೆಲ್ಲ || ೪ ||

ಇಂತಿಂಥ ದೊಡ್ಡವರು ಈ ಪಾಡು ಪಡಲಾಗಿ

ಭ್ರಾಂತ ಜನರಿಗೆ ಪೇಳಲಿನ್ನೆಷ್ಟು

ಕಂತು ಪಿತ ಕಾಗಿನೆಲೆಯಾದಿಕೇಶವನ

ಸಂತೋಷದಲಿ ಪಾಡಿ ಸುಖಿಯಾಗೊ ಮನುಜ || ೫ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರೂ ಸಂಗಡ ಬಾಹೋರಿಲ್ಲ ( ರಾಗ - ಮಧ್ಯಮಾವತಿ, ತಾಳ - ಅಟ )

ಆರೂ ಸಂಗಡ ಬಾಹೋರಿಲ್ಲ ಸಿರಿ 

ನಾರಾಯಣನ ಸ್ಮರಣೆ ನೆರೆ ಬಾಹೋದಲ್ಲದೆ || ಪ ||

ಹೊತ್ತು ನವಮಾಸಪರ್ಯಂತ ಗರ್ಭದೊಳು

ಅತ್ಯಂತ ನೋವು ಬೇನೆಗಳಿಂದಲಿ

ಹೆತ್ತು ತುಪ್ಪವನಿಕ್ಕಿ ಸಲಹಿದ ತಾಯ್ತಂದೆ

ಅತ್ತು ಕರೆದುಳಿವರು ಮತ್ತೆ ಬೆನ್ನಲಿ ಬಾಹರೆ ? || ೧ ||

ಮನೆಮಕ್ಕಳಿವರೆನ್ನ ತನುವಿಗೊಡೆಯರೆಂದು

ಘನವಾಗಿ ಬಲುನಂಬಿ ನೆಚ್ಚುತಿಹರು

ಅನುಮಾನವಾಗಿ ಜೀವನು ತೊಲಗಿದಾಕ್ಷಣದಿ

ಮನೆಯೊಳೊಂದರೆಗಳಿಗೆ ನಿಲ್ಲಿಸಿಕೊಳ್ಳರೊ || ೨ ||

ಸುತ್ತಮುತ್ತಲು ಕುಳಿತಿದ್ದ ಬಂಧು ಜನರು

ಹೊತ್ತುಹೋಯಿತೇಳಿರೇಳೆಂಬರು

ಒತ್ತಿದ ಕಸಕಿಂತ ಕಡುಕಷ್ಟದೀ ದೇಹ

ಹೊತ್ತೊಯ್ದು ಅಗ್ನಿಯೊಳು ಬಿಸುಟಿಬಾಹರೊ || ೩ ||

ಧರೆಮಿತ್ರ ಬುಧಜನರ ಅಗ್ನಿಸಾಕ್ಷಿಯ ಮಾಡಿ

ಕರವಿಡಿದು ಧಾರೆಯನೆರೆಸಿಕೊಂಡ

ತರುಣಿ ತನ್ನಿನಿಯನ ಮುಟ್ಟಲಂಜಿ ದೂರದಲಿ

ಪೊರೆವರು ತನಗಾರು ಪೇಳೆಂಬಳು || ೪ ||

ಹರಣ ಹಿಂಗದ ಮುನ್ನ ಹರಿಯ ಸೇವೆಯ ಮಾಡು

ಪರಲೋಕಸಾಧನವನು ಮಾಡು

ಕರುಣಿ ಕೃಪಾಳು ಕಾಗಿನೆಲೆಯಾದಿಕೇಶವನ

ಚರಣಕಮಲವ ನಂಬಿ ಸುಖಿಯಾಗು ಮನವೆ || ೫ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರು ಹಿತವರು ಎಂದು ನಂಬಬೇಡ ( ರಾಗ - ಕಾಂಬೋದಿ, ತಾಳ - ಝಂಪೆ )

ಆರು ಹಿತವರು ಎಂದು ನಂಬಬೇಡ || ಪ ||

ಆರಿಗಾರಿಲ್ಲ ಆಪತ್ತು ಬಂದೊದಗಿದಡೆ || ಅ.ಪ ||

ಜನಕ ಹಿತವೆಂದು ನಂಬಬಹುದೇ ಹಿಂದೆ

ತನಯ ಪ್ರಹ್ಲಾದನಿಗೆ ಪಿತ ಮುನಿದನು

ಜನನಿ ರಕ್ಷಿಪಳೆಂತೆಂಬೆನೇ ಆ ಕುಂತಿ

ತನಯ ರಾಧೇಯನಿಗೆ ಎರಡೆಣಿಸಿದ ಮೇಲೆ || ೧ ||

ಮಗನು ತೆತ್ತಿಗನೆನಲೆ ಕಂಸ ತನ್ನಯ ಪಿತನ

ನಿಗಳ ಬಂಧನದಿಂದ ಬಂಧಿಸಿದನು

ಜಗವರಿಯೆ ಸೋದರನು ಮಮತೆಯುಳ್ಳವನೆನಲೆ

ಹಗೆವೆರಸಿ ವಾಲಿಯನು ಅನುಜ ಕೊಲಿಸಿದ ಮೇಲೆ || ೨ ||

ತನಗೆ ದೇಹಾನುಬಂಧುಗಳೆ ಬಂಧುಗಳೆಂದು

ಮನದಿ ನಿಚ್ಚಳವಾಗಿ ನಂಬಬೇಡ

ಘನಕೃಪಾನಿಧಿ ಕಾಗಿನೆಲೆಯಾದಿಕೇಶವನ

ಅನುದಿನ ನಂಬಿದವಗಿಹಪರದಿ ಸುಖವು || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಸಂಜೀವನ ಗಿರಿಧರ ಪಾಹಿಮಾಂ

ಸಂಜೀವನ ಗಿರಿಧರ ಪಾಹಿಮಾಂ || ಪಾ ||

ಚಕ್ರತೀರ್ಥನಿವಾಸ ಶಕ್ರಾಧ್ಯಮರಾಧೀಶ

ವಕ್ರಾಸನ ಮೂರುತಿ ಪಾಹಿಮಾಂ || ೧ ||

ಮಂತ್ರ ಮೂಲಸ್ಥತ ಕಂತು ಪಿತನ ದೂತ

ಯಂತ್ರೋದ್ಧಾರಕ ಪಾಹಿಮಾಂ || ೨ ||

ಮೋಹನವಿಠಲದಾಸ ಪೋಶಕ

ಮಾಯಾ ಮೋಹ ಭಂಜಕ ಪಾಹಿಮಾಂ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರು ಬಾಳಿದರೇನು ಆರು ಬದುಕಿದರೇನು ( ರಾಗ - ಮೋಹನ, ತಾಳ - ಅಟ )

ಆರು ಬಾಳಿದರೇನು ಆರು ಬದುಕಿದರೇನು

ನಾರಾಯಣನ ಸ್ಮರಣೆ ನಮಗಿಲ್ಲದನಕ || ಪ ||

ಉಣ್ಣ ಬರದವರಲ್ಲಿ ಊರೂಟವಾದರೆ ಏನು

ಹಣ್ಣು ಬಿಡದ ಮರಗಳು ಹಾಳಾದರೇನು

ಕಣ್ಣಿಲ್ಲದವಗಿನ್ನು ಕನ್ನಡಿಯಿದ್ದು ಫಲವೇನು

ಪುಣ್ಯವಿಲ್ಲದವನ ಪ್ರೌಢಿಮೆ ಮೆರೆದರೇನು ? || ೧ ||

ಅಕ್ಕರಿಲ್ಲದವಗೆ ಮ್ಕಳಿದ್ದು ಫಲವೇನು

ಹೊಕ್ಕು ನಡೆಯದ ನಂಟತನದೊಳೇನು

ರೊಕ್ಕವಿಲ್ಲದವಗೆ ಬಂಧುಗಳು ಇದ್ದರೇನು

ಮರ್ಕಟನ ಕೈಯೊಳಗೆ ಮಾಣಿಕ್ಯವಿದ್ದರೇನು ? || ೨ ||

ಅಲ್ಪದೊರೆಗಳ ಜೀತ ಎಷ್ಟು ಮಾಡಿದರೇನು

ಬಲ್ಪಂಥವಿಲ್ಲದವನ ಬಾಳ್ವೆಯೇನು

ಕಲ್ಪಕಲ್ಪಿತ ಕಾಗಿನೆಲೆಯಾದಿಕೇಶವನ

ಸ್ವಲ್ಪವೂ ನೆನೆಯದ ನರನಿದ್ದರೇನು ? || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರು ಬಲ್ಲರು ಹರಿ ಹರರ ಮಹಿಮೆಯನು ( ರಾಗ - ಕಾಂಬೋಧಿ, ತಾಳ - ಝಂಪೆ )

ಆರು ಬಲ್ಲರು ಹರಿ ಹರರ ಮಹಿಮೆಯನು

ವಾರಿಜೋದ್ಭವ ಸುರೇಂದ್ರಾದಿಗಳಿಗಳವಲ್ಲ || ಪ ||

ಪೌರತ್ರಯ ಗೆಲುವ ಸಮಯದಲಿ ತಪವಮಾಡಿ

ನಾರಾಯಣಾಸ್ತ್ರವನು ಪಡೆದನೀಶ

ಗೌರೀಮನೋಹರನ ಘನತರಾರ್ಚನೆಗೈದು

ಚಾರುತರ ಚಕ್ರವನು ಪಡೆದನಾ ಶೌರಿ || ೧ ||

ಬಲಿ ಚಕ್ರವರ್ತಿ ಭಕ್ತಿಗೆ ಮೆಚ್ಚಿ ಅವನ ಬಾ-

ಗಿಲಕಾಯ್ದನಚ್ಯುತನು ಅನುಗಾಲದಿ

ಬಲುಭುಜನ ಬಾಣಾಸುರನ ಗೃಹದ್ವಾರವನು

ಬಳಸಿ ಕಾಯ್ದನು ಹರನು ವರವ ತಾನಿತ್ತು || ೨ ||

ಭೋಗಿಶಯನನು ಆಗಿ ಭೋಗಿಭೂಷಣನಾಗಿ

ವಾಗೀಶನಾಗಿ ಸೃ್ಷ್ಠಿ ಸ್ಥತಿ ಲಯಗಳಿಂಗೆ

ಆಗು ಕಾರಣ ಕಾರ್ಯ ಕರ್ಮಾದಿ ರೂಪಕ್ಕೆ

ಕಾಗಿನೆಲೆಯಾದಿಕೇಶವನ ಮಹಿಮೆಯನು || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು

ಆರಿಗಿಲ್ಲ ಆಪತ್ಕಾಲದೊಳಗೆ ( ರಾಗ - ಕಾಂಬೋಧಿ, ತಾಳ - ಝಂಪೆ )

ಆರಿಗಿಲ್ಲ ಆಪತ್ಕಾಲದೊಳಗೆ || ಪ ||

ವಾರಿಜಾಕ್ಷನ ನಾಮ ನೆನೆ ಕಂಡ್ಯ ಮನವೆ || ಅ.ಪ ||

ಹಸಿದು ಬಳಲುವಾಗ ಹಗೆ ಕೈಗೆ ಸಿಲುಕಿದಾಗ

ದೆಸೆಗೆಟ್ಟು ಅಧಿಕ ವ್ಯಾಧಿಯಲಿ ಇರುವಾಗ

ಅಸಮಾನನಾದಾಗ ಅತಿ ಭೀತಿಗೊಂಡಾಗ

ಬಿಸಜನಾಭನ ನಾಮ ನೆನೆಕಂಡ್ಯ ಮನವೆ || ೧ ||

ಸಾಲದವರೆಳೆವಾಗ ಚಾಡಿ ಮಾತಿಗೆ ಭೂಪ

ಘುಳುಘುಳಿಸುತ ಕೋಪವನ್ನು ತೋರಿದಾಗ

ಮೇಲು ತಾನರಿಯದಯೆ ನಿಂದೆ ಹೊಂದಿರುವಾಗ

ನೀಲಮೇಘಶ್ಯಾಮನ ನೆನೆಕಂಡ್ಯ ಮನವೆ || ೨ ||

ಪಂಥದಲಿರುವಾಗ ಪದವಿ ತಪ್ಪಿರುವಾಗ

ದಂತಿ ಮದವೇರಿ ಬೆನ್ಹತ್ತಿದಾಗ

ಕಂತುಪಿತಕಾಗಿನೆಲೆಯಾದಿಕೇಶವ ನಿ

ಶ್ಚಿಂತೆಯಿಂದಲಿ ನೀನು ನೆನೆಕಂಡ್ಯ ಮನವೆ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು