ಆರಿಗಿಲ್ಲ ಆಪತ್ಕಾಲದೊಳಗೆ ( ರಾಗ - ಕಾಂಬೋಧಿ, ತಾಳ - ಝಂಪೆ )

ಆರಿಗಿಲ್ಲ ಆಪತ್ಕಾಲದೊಳಗೆ || ಪ ||

ವಾರಿಜಾಕ್ಷನ ನಾಮ ನೆನೆ ಕಂಡ್ಯ ಮನವೆ || ಅ.ಪ ||

ಹಸಿದು ಬಳಲುವಾಗ ಹಗೆ ಕೈಗೆ ಸಿಲುಕಿದಾಗ

ದೆಸೆಗೆಟ್ಟು ಅಧಿಕ ವ್ಯಾಧಿಯಲಿ ಇರುವಾಗ

ಅಸಮಾನನಾದಾಗ ಅತಿ ಭೀತಿಗೊಂಡಾಗ

ಬಿಸಜನಾಭನ ನಾಮ ನೆನೆಕಂಡ್ಯ ಮನವೆ || ೧ ||

ಸಾಲದವರೆಳೆವಾಗ ಚಾಡಿ ಮಾತಿಗೆ ಭೂಪ

ಘುಳುಘುಳಿಸುತ ಕೋಪವನ್ನು ತೋರಿದಾಗ

ಮೇಲು ತಾನರಿಯದಯೆ ನಿಂದೆ ಹೊಂದಿರುವಾಗ

ನೀಲಮೇಘಶ್ಯಾಮನ ನೆನೆಕಂಡ್ಯ ಮನವೆ || ೨ ||

ಪಂಥದಲಿರುವಾಗ ಪದವಿ ತಪ್ಪಿರುವಾಗ

ದಂತಿ ಮದವೇರಿ ಬೆನ್ಹತ್ತಿದಾಗ

ಕಂತುಪಿತಕಾಗಿನೆಲೆಯಾದಿಕೇಶವ ನಿ

ಶ್ಚಿಂತೆಯಿಂದಲಿ ನೀನು ನೆನೆಕಂಡ್ಯ ಮನವೆ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು