ಆರು ಬಾಳಿದರೇನು ಆರು ಬದುಕಿದರೇನು ( ರಾಗ - ಮೋಹನ, ತಾಳ - ಅಟ )

ಆರು ಬಾಳಿದರೇನು ಆರು ಬದುಕಿದರೇನು

ನಾರಾಯಣನ ಸ್ಮರಣೆ ನಮಗಿಲ್ಲದನಕ || ಪ ||

ಉಣ್ಣ ಬರದವರಲ್ಲಿ ಊರೂಟವಾದರೆ ಏನು

ಹಣ್ಣು ಬಿಡದ ಮರಗಳು ಹಾಳಾದರೇನು

ಕಣ್ಣಿಲ್ಲದವಗಿನ್ನು ಕನ್ನಡಿಯಿದ್ದು ಫಲವೇನು

ಪುಣ್ಯವಿಲ್ಲದವನ ಪ್ರೌಢಿಮೆ ಮೆರೆದರೇನು ? || ೧ ||

ಅಕ್ಕರಿಲ್ಲದವಗೆ ಮ್ಕಳಿದ್ದು ಫಲವೇನು

ಹೊಕ್ಕು ನಡೆಯದ ನಂಟತನದೊಳೇನು

ರೊಕ್ಕವಿಲ್ಲದವಗೆ ಬಂಧುಗಳು ಇದ್ದರೇನು

ಮರ್ಕಟನ ಕೈಯೊಳಗೆ ಮಾಣಿಕ್ಯವಿದ್ದರೇನು ? || ೨ ||

ಅಲ್ಪದೊರೆಗಳ ಜೀತ ಎಷ್ಟು ಮಾಡಿದರೇನು

ಬಲ್ಪಂಥವಿಲ್ಲದವನ ಬಾಳ್ವೆಯೇನು

ಕಲ್ಪಕಲ್ಪಿತ ಕಾಗಿನೆಲೆಯಾದಿಕೇಶವನ

ಸ್ವಲ್ಪವೂ ನೆನೆಯದ ನರನಿದ್ದರೇನು ? || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು