ಆರು ಹಿತವರು ಎಂದು ನಂಬಬೇಡ ( ರಾಗ - ಕಾಂಬೋದಿ, ತಾಳ - ಝಂಪೆ )

ಆರು ಹಿತವರು ಎಂದು ನಂಬಬೇಡ || ಪ ||

ಆರಿಗಾರಿಲ್ಲ ಆಪತ್ತು ಬಂದೊದಗಿದಡೆ || ಅ.ಪ ||

ಜನಕ ಹಿತವೆಂದು ನಂಬಬಹುದೇ ಹಿಂದೆ

ತನಯ ಪ್ರಹ್ಲಾದನಿಗೆ ಪಿತ ಮುನಿದನು

ಜನನಿ ರಕ್ಷಿಪಳೆಂತೆಂಬೆನೇ ಆ ಕುಂತಿ

ತನಯ ರಾಧೇಯನಿಗೆ ಎರಡೆಣಿಸಿದ ಮೇಲೆ || ೧ ||

ಮಗನು ತೆತ್ತಿಗನೆನಲೆ ಕಂಸ ತನ್ನಯ ಪಿತನ

ನಿಗಳ ಬಂಧನದಿಂದ ಬಂಧಿಸಿದನು

ಜಗವರಿಯೆ ಸೋದರನು ಮಮತೆಯುಳ್ಳವನೆನಲೆ

ಹಗೆವೆರಸಿ ವಾಲಿಯನು ಅನುಜ ಕೊಲಿಸಿದ ಮೇಲೆ || ೨ ||

ತನಗೆ ದೇಹಾನುಬಂಧುಗಳೆ ಬಂಧುಗಳೆಂದು

ಮನದಿ ನಿಚ್ಚಳವಾಗಿ ನಂಬಬೇಡ

ಘನಕೃಪಾನಿಧಿ ಕಾಗಿನೆಲೆಯಾದಿಕೇಶವನ

ಅನುದಿನ ನಂಬಿದವಗಿಹಪರದಿ ಸುಖವು || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು