ಅನುಗಾಲವು ಚಿಂತೆ ಜೀವಕೆ ( ರಾಗ - ಕಾನಡ, ತಾಳ - ಅಟ್ಟ )

ಅನುಗಾಲವು ಚಿಂತೆ ಜೀವಕೆ ತನ್ನ

ಮನವು ಶ್ರೀರಂಗನೊಳ್ ಮೆಚ್ಚುವ ತನಕ || ಪ ||

ಸತಿಯು ಇದ್ದರು ಚಂತೆ ಸತಿಯು ಇಲ್ಲದ ಚಿಂತೆ

ಮತಿಹೀನ ಸತಿಯಾದರೂ ಚಿಂತೆಯು

ಪೃಥವಿಯೊಳಗೆ ಸತಿ ಅತಿ ಚೆಲ್ವೆಯಾದರೆ

ಮಿತಿ ಮೇರೆಯಿಲ್ಲದ ಮೋಹದ ಚಿಂತೆ || ೧ ||

ಪುತ್ರರಿದ್ದರು ಚಿಂತೆ ಪುತ್ರರಿಲ್ಲದ ಚಿಂತೆ 

ಅತ್ತು ಅನ್ನಕೆ ಕಾಡುವ ಚಿಂತೆಯು

ತುತ್ತಿನ ಆಸೆಗೆ ತುರುಗಳ ಕಾಯ್ದರು

ಸುತ್ತೇಳು ಕಡೆಯಿಲ್ಲದ ಚಿಂತೆಯು || ೨ ||

ಬಡವನಾದರು ಚಿಂತೆ ಬಲಿದನಾದರು ಚಿಂತೆ

ಹಿಡಿ ಹೊನ್ನು ಕೈಯೊಳಿದ್ದರು ಚಿಂತೆಯು

ಪೊಡವಿಯೊಳಗೆ ಸಿರಿಪುರಂದರವಿಠಲನ

ಬಿಡದೆ ಧ್ಯಾನಿಸಿದರೆ ಚಿಂತೆ ನಿಶ್ಚಿಂತೆ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು