ಮಧ್ವನಾಮ

ತಂ ವಂದೇ ನರಸಿಂಹ ತೀರ್ಥನಿಲಯಂ ಶ್ರೀ ವ್ಯಾಸರಾಟ್ ಪೂಜಿತಂ |

ಧ್ಯಾಯಂತಂ ಮನಸಾ ನರಸಿಂಹಚರಣಂ ಶ್ರೀಪಾದರಾಜಂ ಗುರುಂ ||

ಜಯ ಜಯ ಜಗತ್ರಾಣ ಜಗದೊಳಗೆ ಸುತ್ರಾಣ

ಅಖಿಲಗುಣ ಸದ್ಧಾಮ ಮಧ್ವನಾಮ (೨)

ಆವ ಕಚ್ಚಪರೂಪದಿಂದ ಲಂಡೊದಕವ 

ಓವಿ ಧರಿಸಿದಶೇಷ ಮೂರುತಿಯನು

ಆವವನ ಬಳಿವಿಡಿದು ಹರಿಯ ಸುರರೈದುವರು

ಆ ವಾಯು ನಮ್ಮ ಕುಲ ಗುರುರಾಯನು || ೧ ||

ಜಯ ಜಯ ಜಗತ್ರಾಣ... (೨)

ಆವವನು ದೇಹದೊಳಗಿರಲು ಹರಿ ನೆಲೆಸಿಹನು

ಆವವನು ತೊಲಗೆ ಹರಿ ತಾ ತೊಲಗುವ

ಆವವನು ದೇಹದ ಒಳಹೊರಗೆ ನಿಯಾಮಕನು

ಆ ವಾಯು ನಮ್ಮ ಕುಲಗುರುರಾಯನು || ೨ ||

ಜಯ ಜಯ ಜಗತ್ರಾಣ... (೨)

ಕರಣಾಭಿಮಾನಿ ಸುರರು ದೇಹವಾ ಬಿಡಲು

ಕುರುಡ ಕಿವುಡಾ ಮೂಕನೆಂದೆನಿಸುವಾ

ಪರಮ ಮುಖ್ಯಪ್ರಾಣ ತೊಲಗಲಾ ದೇಹವನು

ಅರಿತು ಪೆಣವೆಂದು ಪೆಳುವರು ಬುಧಜನ || ೩ ||

ಜಯ ಜಯ ಜಗತ್ರಾಣ... (೨)

ಸುರರೊಳಗೆ ನರರೊಳಗೆ ಸರ್ವಭೂತಗಳೊಳಗೆ 

ಪರತರನೆನಿಸಿ ನಿಯಾಮಿಸಿ ನೆಲೆಸಿಹ

ಹರಿಯನಲ್ಲದೆ ಬಗೆಯ ಅನ್ಯರನು ಲೊಕದೊಳು

ಗುರುಕುಲ ತಿಲಕ ಮುಖ್ಯ ಪವಮಾನನು || ೪ ||

ಜಯ ಜಯ ಜಗತ್ರಾಣ... (೨)

ತ್ರೇತೆಯಲಿ ರಘುಪತಿಯ ಸೆವೆಮಾಡುವೆನೆಂದು

ವಾತಸುತ ಹನುಮಂತನೆಂದೆನಿಸಿದ

ಪೋತಭಾವದಿ ತರಣಿ ಬಿಂಬಕ್ಕೆ ಲಂಘಿಸಿದ

ಈತಗೆಣೆಯಾರು ಮೂರ್ಲೊಕದೊಳಗೆ || ೫ ||

ಜಯ ಜಯ ಜಗತ್ರಾಣ... (೨)

ತರಣಿಗಭಿಮುಖವಾಗಿ ಶಬ್ದಶಾಸ್ತ್ರವ ಪಠಿಸಿ

ಉರವಣಿಸಿ ಹಿಂದುಮುಂದಾಗಿ ನಡೆದ

ಪರಮ ಪವಮಾನಸುತ ಉದಯಾಸ್ತ ಶೈಲಗಳ

ಭರದಿಯೈದಿದಗೀತಗುಪಮೆ ಉಂಟೇ || ೬ ||

ಜಯ ಜಯ ಜಗತ್ರಾಣ... (೨)

ಅಖಿಲ ವೇದಗಳ ಸಾರ ಪಠಿಸಿದನು ಮುನ್ನಲ್ಲಿ

ನಿಖಿಲ ವ್ಯಾಕರಣಗಳ ಇವ ಪಠಿಸಿದ

ಮುಖದಲ್ಲಿ ಕಂಚಿದಪಶಬ್ದ ಇವಗಿಲ್ಲವೆಂದು

ಮುಖ್ಯಪ್ರಾಣನನು ರಾಮನನುಕರಿಸಿದ || ೭ ||

ಜಯ ಜಯ ಜಗತ್ರಾಣ... (೨)

ತರಣಿ ಸುತನನು ಕಾಯ್ದು ಶರಧಿಯನು ನೆರೆ ದಾಟಿ

ಧರಣಿಸುತೆಯಳ ಕಂಡು ದನುಜರೊಡನೆ

ಭರದಿ ರಣವನೆ ಮಾಡಿ ಗೆಲಿದು ದಿವ್ಯಾಸ್ತ್ರಗಳ

ಉರುಹಿ ಲಂಕೆಗೆ ಬಂದ ಹನುಮಂತನು || ೮ ||

ಜಯ ಜಯ ಜಗತ್ರಾಣ... (೨)

ಹರಿಗೆ ಚೂಡಾಮಣಿಯನಿತ್ತು ಹರಿಗಳ ಕೂಡಿ

ಶರಧಿಯನು ಕಟ್ಟಿ ಬಲು ರಕ್ಕಸರನು 

ಒರೆಸಿ ರಣದಲ್ಲಿ ದಶಶಿರನ ಹುಡಿಗುಟ್ಟಿ ತಾ

ಮೆರೆದ ಹನುಮಂತ ಬಲವಂತ ಧೀರಾ || ೯ ||

ಜಯ ಜಯ ಜಗತ್ರಾಣ... (೨)

ಉರಗ ಬಂಧಕ್ಕೆ ಸಿಲುಕಿ ಕಪಿವರರು ಮೈಮರೆಯೆ

ತರಣಿಕುಲತಿಲಕನಾಜ್ಞೆಯನೆ ತಾಳಿದ

ಗಿರಿಸಹಿತ ಸಂಜೀವನವ ಕಿತ್ತು ತಂದಿತ್ತ

ಹರಿವರಗೆ ಸರಿಯುಂಟೆ ಹನುಮಂತಗೆ || ೧೦ ||

ಜಯ ಜಯ ಜಗತ್ರಾಣ... (೨)

ವಿಜಯ ರಘುಪತಿ ಮೆಚ್ಚಿ ಧರಣಿಸುತೆಯಳಿಗೀಯೆ

ಭಜಿಸಿ ಮೌಕ್ತಿಕದ ಹಾರವನು ಪಡೆದ

ಅಜಪದವಿಯನು ರಾಮ ಕೊಡುವೆನೆನೆ ಹನುಮಂತ

ನಿಜ ಭಕುತಿಯನೆ ಬೇಡಿ ವರವ ಪಡೆದ || ೧೧ ||

ಜಯ ಜಯ ಜಗತ್ರಾಣ... (೨)

ಆ ಮಾರುತನೆ ಭೀಮನೆನಿಸಿ ದ್ವಾಪರದಲ್ಲಿ

ಸೋಮಕುಲದಲಿ ಜನಿಸಿ ಪಾರ್ಥನೊಡನೆ

ಭೀಮವಿಕ್ರಮ ರಕ್ಕಸರ ಮುರಿದು ಅಟ್ಟಿದ

ಆ ಮಹಿಮ ನಮ್ಮ ಕುಲ ಗುರುರಾಯನು || ೧೨ ||

ಜಯ ಜಯ ಜಗತ್ರಾಣ... (೨)

ಕರದಿಂದ ಶಿಶುಭಾವನಾದ ಭೀಮನ ಬಿಡಲು

ಗಿರಿಯೊಡೆದು ಶತಶೃಂಗವೆಂದೆನಿಸಿತು

ಹರಿಗಳ ಹರಿಗಳಿಂ ಕರಿಗಳ ಕರಿಗಳಿಂ 

ಅರೆವ ವೀರನಿಗೆ ಸುರನರರು ಸರಿಯೆ || ೧೩ ||

ಜಯ ಜಯ ಜಗತ್ರಾಣ... (೨)

ಕುರುಪ ಗರಳವನಿಕ್ಕೆ ನೆರೆ ಉಂಡು ತೇಗಿ

ಹಸಿದುರಗಗಳ ಮ್ಯಾಲೆರಗನದನೊರಸಿದ

ಅರಗಿನಮನೆಯಲ್ಲಿ ಉರಿಯನಿಕ್ಕಲು ವೀರ

ಧರಿಸಿ ಜಾಹ್ನವಿಗೊಯ್ದ ತನ್ನನುಜರ || ೧೪ ||

ಜಯ ಜಯ ಜಗತ್ರಾಣ... (೨)

ಅಲ್ಲಿರ್ದ ಬಕ ಹಿಡಿಂಬಕರೆಂಬ ರಕ್ಕಸರ

ನಿಲ್ಲದೊರೆಸಿದ ಲೋಕಕಂಟಕರನು

ಬಲ್ಲಿದಸುರರ ಗಲಿದು ದ್ರೌಪದಿಯ ಕೈಪಿಡಿದು

ಎಲ್ಲ ಸುಜನರಿಗೆ ಹರುಷವ ತೋರಿದ || ೧೫ ||

ಜಯ ಜಯ ಜಗತ್ರಾಣ... (೨)

ರಾಜಕುಲವಜ್ರನೆನಿಸಿದ ಮಾಗಧನ ಸೀಳಿ

ರಾಜಸೂಯಾಯಾಗವನು ಮಾಡಿಸಿದನು

ಆಜಿಯೊಳು ಕೌರವರ ಬಲವ ಸವರುವೆನೆಂದು

ಮೂಜಗವರಿಯೆ ಕಂಕಣ ಕಟ್ಟಿದ || ೧೬ ||

ಜಯ ಜಯ ಜಗತ್ರಾಣ... (೨)

ಕಾನನವ ಪೊಕ್ಕು ಕಿಮ್ಮೀರಾದಿಗಳ ಮುರಿದು

ದಾನವರ ಸವರಬೇಕೆಂದು ಬ್ಯಾಗ

ಮಾನನಿಧಿ ದ್ರೌಪದಿಯ ಮನದಿಂಗಿತವನರಿತು

ಮಾನಿನಿಗೆ ಸೌಗಂಧಿಕವನೆ ತಂದ || ೧೭ ||

ಜಯ ಜಯ ಜಗತ್ರಾಣ... (೨)

ದುರುಳಕೀಚಕನು ದ್ರೌಪದಿಯ ಚೆಲುವಿಕೆಗೆ

ಮರುಳಾಗಿ ಕರೆಕರೆಯ ಮಾಡಲವನ

ಗರಡಿಮನೆಯಲ್ಲಿ ಬರಸಿ ಅವನನ್ವಯವ

ಕುರುಪನಟ್ಟಿದ ಮಲ್ಲ ಕುಲವ ಸದೆದ ||  ೧೮ ||

ಜಯ ಜಯ ಜಗತ್ರಾಣ... (೨)

ಕೌರವರ ಬಲ ಸವರಿ ವೈರಿಗಳ ನೆಗ್ಗೊತ್ತಿ

ಓರಂತೆ ಕೌರವರ ಮುರಿದು ಮೆರೆದ

ವೈರಿ ದುಶ್ಯಾಸನನ ರಣದಲ್ಲಿ ಎದೆಗೆಡಹಿ

ವೀರ ನರಹರಿಯ ಲೀಲೆಯ ತೋರಿದ || ೧೯ ||

ಜಯ ಜಯ ಜಗತ್ರಾಣ... (೨)

ಗುರುಸುತನು ಸಂಗರದಿ ನಾರಾಯಣಾಸ್ತ್ರವನು 

ಉರವಣಿಸಿ ಬಿಡಲು ಶಸ್ತ್ರವ ಬಿಸುಟದೆ 

ಹರಿಯ ಕೃಪೆ ಪಡೆದಿದ್ದ ಭೀಮ ಹುಂಕಾರದಲಿ

ಹರಿಯ ದಿವ್ಯಾಸ್ತ್ರವನು ನೆರೆ ಅಟ್ಟಿದ || ೨೦ ||

ಜಯ ಜಯ ಜಗತ್ರಾಣ... (೨)

ಚಂಡವಿಕ್ರಮನು ಗದೆಗೊಂಡು ರಣದಿ ಭೂ

ಮಂಡಲದೊಳಿದಿರಾಂತ ಖಳರನೆಲ್ಲ

ಹಿಂಡಿ ಬಿಸುಟಿಹ ವೃಕೋದರನ ಪ್ರತಾಪವನು

ಕಂಡು ನಿಲ್ಲುವರಾರು ತ್ರಿಭುವನದೊಳು || ೨೧ ||

ಜಯ ಜಯ ಜಗತ್ರಾಣ... (೨)

ನಾರಿರೋದನ ಕೇಳಿ ಮನಮರುಗಿ ಗುರುಸುತನ 

ಹಾರಿಹಿಡಿದು ಶಿರೋರತ್ನ ಕಿಟ್ಟಿ ತೆಗೆದ

ನೀರೊಳಗಡಗಿದ್ದ ದುರ್ಯೋಧನನ ಹೊರಗೆಡಹಿ

ಉರುಯುಗ ತನ್ನ ಗದೆಯಿಂದ ಮುರಿದ || ೨೨ ||

ಜಯ ಜಯ ಜಗತ್ರಾಣ... (೨)

ದಾನವರು ಕಲಿಯುಗದೊಳವತರಿಸಿ ವಿಭುದರೊಳು

ವೇನನ ಮತವನರುಹಲದನರಿತು

ಜ್ಞಾನಿ ತಾ ಪವಮಾನ ಭೂತಳದೊಳವತರಿಸಿ

ಮಾನನಿಧಿ ಮಧ್ವಾಕ್ಯನೆಂದೆನಿಸಿದ || ೨೩ ||

ಜಯ ಜಯ ಜಗತ್ರಾಣ... (೨)

ಅರ್ಭಕತನದೊಳೈದಿ ಬದರಿಯಲಿ ಮಧ್ವಮುನಿ

ನಿರ್ಭಯದಿ ಸಕಲ ಶಾಸ್ತ್ರಗಳ ಪಠಿಸಿದ

ಉರ್ವಿಯೊಳು ಮಾಯೆ ಬೀರಲು ತತ್ವಮಾರ್ಗವನು

(ಉರ್ವಿಯೊಳು ಆಮ್ನಾಯ ತತ್ತವದ ಮಾರ್ಗವನು)

ಓರ್ವ ಮಧ್ವಮುನಿ ತೋರ್ದ ಸುಜನರ್ಗೆ

(ಸರ್ವ ಸುಜನರ್ಗೆ ಅರುಹಿದನು ಮೋದದಿ) || ೨೪ ||

ಜಯ ಜಯ ಜಗತ್ರಾಣ... (೨)

ಸರ್ವೇಶ ಹರಿ ವಿಶ್ವ ಎಲ್ಲ ತಾ ಪುಸಿಯೆಂಬ

ದುರ್ವಾದಿಗಳ ಮತವ ನೆರೆ ಖಂಡಿಸಿ

ಸರ್ವೇಶ ಹರಿ ವಿಶ್ವ ಸತ್ಯವೆಂದರುಹಿದ

ಶರ್ವಾದಿಗೀರ್ವಾಣಸಂತತಿಯಲಿ || ೨೫ ||

ಜಯ ಜಯ ಜಗತ್ರಾಣ... (೨)

ಏಕವಿಂಶತಿ ಕುಭಾಷ್ಯಗಳ ಬೇರನು ತರಿದು

ಶ್ರೀಕರಾರ್ಚಿತನೊಲುಮೆ ಶಾಸ್ತ್ರರಚಿಸಿ 

ಲೋಕತ್ರಯದೊಳಿದ್ದ ಸುರರು ಆಲಿಸುವಂತೆ

ಆ ಕಮಲನಾಭಾದಿಯತಿಕರಕೊರೆದ || ೨೬ ||

ಜಯ ಜಯ ಜಗತ್ರಾಣ... (೨)

ಬದರಿಕಾಶ್ರಮಕೆ ಪುನರಪಿಯೈದಿ ವ್ಯಾಸಮುನಿ

ಪದಕೆರಗಿ ಅಖಿಲವೇದಾರ್ಥಗಳನು

ಪದುಮನಾಭನ ಮುಖದಿ ತಿಳಿದು ಬ್ರಹ್ಮತ್ವ

ವೈದಿದ ಮಧ್ವಮುನಿರಾಯಗಭಿವಂದಿಪೆ || ೨೭ ||

ಜಯ ಜಯ ಜಗತ್ರಾಣ... (೨)

ಜಯಜಯತು ದುರ್ವಾದಿಮತತಿಮಿರಮಾರ್ತಾಂಡ

ಜಯಜಯತು ವಾದಿಗಜಪಂಚಾನನ

ಜಯಜಯತು ಚಾರ್ವಾಕಗರ್ವಪರ್ವತಕುಲಿಶ

ಜಯಜಯ ಜಗನ್ನಾಥ ಮಧ್ವನಾಥ || ೨೮ ||

ಜಯ ಜಯ ಜಗತ್ರಾಣ... (೨)

ತುಂಗಕುಲಗುರುವರನ ಹೃದ್ಕಮಲದಲಿ ನೆಲೆಸಿ

ಭಂಗವಿಲ್ಲದ ಸುಖವ ಸುಜನಕೆಲ್ಲ

ಹಿಂಗದೆ ಕೊಡುವ ಗುರುಮಧ್ವಾಂತರಾತ್ಮಕ

ರಂಗವಿಠ್ಠಲನೆಂದು ನೆರೆ ಸಾರಿರೈ || ೨೯ ||

ಜಯ ಜಯ ಜಗತ್ರಾಣ... (೨)

ಸೋಮಸೂರ್ಯೋಪರಾಗದಿ ಗೋ ಸಹಸ್ರಗಳು

ಭೂಮಿದೇವರಿಗೆ ಸುರನದಿ ತೀರದಿ

ಶ್ರೀ ಮುಕುಂದಾರ್ಪಣವೆನುತ ಕೊಟ್ಟ ಫಲಮಕ್ಕು

ಈ ಮಧ್ವನಾಮ ಬರೆದೋದಿದರ್ಗೆ || ೩೦ ||

ಪುತ್ರರಿಲ್ಲದವರು ಸತ್ಪುತ್ರರೈದುವರು

ಸರ್ವತ್ರದಲಿ ದಿಗ್ವಿಜಯವಹುದು ಸಕಲ

ಶತ್ರುಗಳು ಕೆಡುವರು ಅಪಮೃತ್ಯು ಬರಲಂಜುವುದು

ಸೂತ್ರನಾಮಕನ ಸಂಸ್ತುತಿ ಮಾತ್ರದಿ || ೩೧ ||

ಶ್ರೀಪಾದರಾಜ ಪೇಳಿದ ಮಧ್ವನಾಮ

ಸಂತಾಪ ಕಳೆದಖಿಲ ಸೌಖ್ಯವನಿಹುವುದು

ಶ್ರೀಪತಿ ಶ್ರೀಜಗನ್ನಾಥವಿಠ್ಠಲನ ತೋರಿ ಭವ

ಕೂಪಾರದಿಂದ ಕಡೆಹಾಯಿಸುವುದು || ೩೨ || 

ಜಯ ಜಯ ಜಗತ್ರಾಣ... (೨)

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು