ಅರಿತು ಭಜಿಪರಾರಯ್ಯ ರಂಗಯ್ಯ ನಿನ್ನ (ರಾಗ - ಮೋಹನ, ತಾಳ - ಅಟ)

ಅರಿತು ಭಜಿಪರಾರಯ್ಯ ರಂಗಯ್ಯ ನಿನ್ನ || ಪ ||

ಸಿರಿದೇವಿಯು ಕಿರುಬೆರಳಲ್ಲಿರುವ ಸೊಬಗನ್ನು 

ಅರಿಯಲಾರಳೊ ದೇವ || ಅ.ಪ ||

ಇಂದಿರಾ ದೇವಿಯು ಅರಿಯಲಾರಳು ದೇವ

ಬೃಂದಾರಕರೆಲ್ಲ ನಿಂದು ಯೋಚಿಪರು

ನಂದತೀರ್ಥರ ಮತದೊಳಗೆ ಬಂದವರೆಲ್ಲ

ಎಂದಿಗಾದರೂ ಪರಮಾನಂದ ಪೊಂದುವರು || ೧ ||

ಮಾನವರು ಹೀನ ಮಾರ್ಗದೊಳು ಮುಳುಗಿಹರು

ಜ್ಞಾನಿಗಳು ನಿಂದು ಧ್ಯಾನಿಪರು ನಿನ್ನ

ನೀನೆ ದಯಮಾಡಿ ಸಲಹೊ ಎನ್ನನು ಕೃಷ್ಣ

ಕಾನನದೊಳು ಕಣ್ಣು ಮುಚ್ಚಿ ಬಿಟ್ಟಿಹರೊ || ೨ ||

ಜಲದೊಳಗಿನ ಕಪ್ಪೆ ಜಲದ ಸವಿಯರಿಯದು

ಜಲದ ಸುಗಂಧವ ಜಲವರಿಯದು

ನೆಲೆಯ ಕಂಡವರ್ಯಾರು ನೆಲೆಯಾದಿಕೇಶವನೆ

ಸುಲಲಿತ ತತ್ವವನು ಸುಲಭ ಮಾರ್ಗದಿ ತೋರೊ || ೩ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು