ಅಹುದಾದಡಹುದೆನ್ನಿ ( ರಾಗ - ಸಾವೇರಿ, ತಾಳ - ಮಟ್ಟ )

ಅಹುದಾದಡಹುದೆನ್ನಿ ಅಲ್ಲವಾದಡಲ್ಲವೆನ್ನಿ

ಸಹಜವಿದು ಸಜ್ಜನರ ಮನಕೆ ಸಮ್ಮತವು || ಪ ||

ಕರಿಕೆಯಿಲ್ಲದ ಬಾಳು ಕರಿವರದನ ದಯೆ ಕೇಳು

ಅರಿತವರಿರೆ ಮನೆಯೊಳು ಅದು ಸ್ವರ್ಗವು ಕೇಳು

ಕರಣಿಕರೊಳಗಣ ನಂಟು ಕಟ್ಟಿದ ಹಣವಿನ ಗಂಟು

ಗುರುವಿನ ವಾಕ್ಯದ ಭಕ್ತಿ ಇಹ-ಪರಕದು ಮುಕ್ತಿ || ೧ ||

ಒಕ್ಕಲಿಗಾಗದ ಗವುಡ ರೊಕ್ಕವ ಪಡೆವಾ ಕೊರಗ

ಮಕ್ಕಳ ಪಡೆವುದು ಪುಣ್ಯ ಅದು ಕೇಳಿರಿಯಣ್ಣ

ಇಕ್ಕುವ ಅನ್ನವು ಧರ್ಮ ಇಹ-ಪರಕದು ಅತಿ ಧರ್ಮ

ಬಿಕ್ಕಳಿಕಿಕ್ಕಿದ ವ್ಯಾಧಿ ಯಮಪುರಕದು ಹಾದಿ || ೨ ||

ಕಂಡರೆ ಸೇರದ ನಾರಿ ಕೆಂಡವನುಗುಳುವ ಮಾರಿ

ದಂಡವ ತೆರಿಸುವ ಪುತ್ರ ಹಗೆಹಳಿಗವ ಮಿತ್ರ

ಉಂಡರೆ ಸೇರದ ತಾಯಿ ಉರಗನ ಮಕ್ಕೆಯಕಾಯಿ

ಹಿಂಡನು ಅಗಲಿದ ಗೋವು ಹುಲಿಗಿಕ್ಕಿದ ಮೇವು || ೩ ||

ಪರನಾರಿಯರೊಡನಾಟ ಗರಳವನಟ್ಟುಂಬಾಟ

ಬರೆದೂ ಅರಿಯದ ಲೆಕ್ಕ ಕಡೆಯಲಿ ಬಹು ದುಃಖ

ಇರಿತಕೆ ಬೆದರುವ ಮದಕರಿ ಮರಿಯೆಂಬ ಕೋಡಗಮರಿ

ಕರೆಬರಲರಿಯದ ಗಂಡ ಅವ ನಾಚಿಕೆ ಭಂಡ || ೪ ||

ಸಮಯಕ್ಕೊದಗದ ಅರ್ಥ ಸಾವಿರವಿದ್ದರು ವ್ಯರ್ಥ

ಸವತಿಯರೊಳಗಣ ಕೂಟ ಎಳನಾಗರ ಕಾಟ

ಅಮರರಿಗೊದಗದ ಯಾಗ ಆಡಿನ ಮೇಲಣ ರೋಗ

ಆದಿಕೇಶವಭಕ್ತ ಅವ ಜೀವ್ನಮುಕ್ತ || ೫ ||

ಶ್ರೀ ಭರತೀರಮಣ ಮುಖ್ಯಪ್ರಾಣಾಂತರ್ಗತ ಶ್ರೀಕೃಷ್ಣಾರ್ಪಣಮಸ್ತು